५ असोज, रोल्पा । अधिकांश पुरुष वैदेशिक रोजगारीका कारण विदेशिएपछि नेपालमा परिवार नियोजनका साधनहरुको विक्रीमा कमी आएको छ । प्राकृतिक गर्भ निरोधक उपायहरु अपनाउने प्रवृत्ति बढेको र श्रीमान्हरु विदेशिएकै कारण विभिन्न जिल्लाहरुमा कण्डमलगायतका परिवार नियोजनका साधनको प्रयोग तथा विक्रीमा कमी आएको हो ।
नेपालको पहाडी जिल्ला रोल्पामा यसको प्रत्यक्ष असर देखिएको छ । रोल्पामा परिवारनियोजनका अस्थायी साधन प्रयोगकर्ता घटन थालेको जिल्ला जनस्वास्थ्य कार्यालयले जनाएको छ।
जिल्ला जनस्वास्थ्य कार्यालयकाअनुसार अघिल्लो आर्थिक वर्षमा अस्थायी परिवारनियोजनको साधन प्रयोगकर्ता ३८ प्रतिशत रहकोमा गतवर्ष यो दर घटेर ३७ प्रतिशतमा झरेको छ ।
घरमा श्रीमान् हुँदा गर्भवती हुने डरका कारण अस्थायी साधन प्रयोगकर्ता बढ्ने गरेको भए पनि रोल्पाका अधिकांश विवाहित पुरुष वैदेशिक रोजगारीमा रहेकाले अस्थायी परिवारनियोजनको साधन आवश्यक नहुँदा तिनको प्रयोगकर्ता घटेको हुनसक्ने उक्त कार्यालयकी नर्स आशा थापाले बताइन्।
परम्परागत सुरक्षित तरिका अपनाएर पनि शारीरिक सम्बन्ध राख्ने दम्पतीको सङ्ख्यामा आएको वृद्धिले पनि अस्थायी साधन प्रयोगकर्ता घटेको हुनसक्ने उनको भनाइ छ । महिनावारीअनुसार गर्भ नरहने पारेर यौन सम्पर्क गर्ने तथा अन्य प्राकृतिक तरिकाबाट गर्भ नरहने उपाय अपनाउने प्रक्रियामा वृद्धि भएको अनुमान सो कार्यालयले गरेको छ ।
अघिल्लो आर्थिक वर्षमा रोल्पामा पिल्स १०४३ जना, डिपो चार हजार ४८४ जना र नरपलान्ट पाँच हजार ४२० जनाले प्रयोग गरेकामा गत वर्ष पिल्स ९८२ जना, डिपो तीन हजार ४९१ जना, नरप्लान्ट ७१६ जनाले प्रयोग गरेका थिए ।
जिल्ला जनस्वास्थ्य कार्यालय र मातहतका स्वास्थ्य संस्थामा प्रसूति गराउने महिलाको सङ्ख्या अघिल्लो वर्ष ८४ प्रतिशत रहेकामा गतवर्ष ८५ प्रतिशत पुगेको छ ।
जिल्लामा अझै १५ प्रतिशत महिलाले असुरक्षित प्रसूति गराउने देखिएको छ । स्वास्थ्य संस्थामा २० वर्ष मुनिका महिला गर्भ परीक्षण गराउन निकै कम आउने गरेको देखिएको छ । कम उमेरमै विवाह गरी गर्भवती हुने महिला लाजले पनि स्वास्थ्य संस्थामा निकै कम आउने गरेको थापाले बताइन् ।
जिल्लामा कम उमेरमै गर्भवती हुने महिलाले नियमित रुपमा स्वास्थ्य संस्थाबाट परीक्षण नगराउने गरेकाले मातृ तथा शिशुको मृत्युमा अपेक्षाकृत सुधार हुन नसकेको उनको ठम्याइँ छ ।
