१ असार, काठमाडौं । प्रधानमन्त्री केपी ओलीले वार्ताका लागि पत्राचार गरेपछि संघीय गठबन्धनमा फुटको संकेत देखिएको छ । खुल्लामंचमा अनशन गरिरहेका गठबन्धन घटकमध्ये नै वार्ताको विषयलाई लिएर विवाद भएको हो। मधेसी मोर्चामा आबद्ध सातमध्ये ६ दल वार्ताको पक्षमा छन्। संघीय समाजवादी फोरमले भने यसको विपक्षमा छ ।
गठबन्धनलाई सम्बोधन नगरेसम्म वार्तामा नबस्ने अडान समाजवादी फोरमका अध्यक्ष उपेन्द्र यादवले लिँदै आएका छन्। मधेसी मोर्चामा आबद्ध तमलोपा, सद्भावना पार्टी, संघीय सद्भावना, तमसपा, रामसपा वार्तामा बस्ने पक्षमा छन्। ती दलका नेताहरूले गम्भीर र संवेदनशील भएर सरकारले पत्र पठाएकाले टुटेको वार्ता जोड्नुपर्ने बताएका छन्।
तमलोपाका महमन्त्री जितेन्द्र सोनलले सरकारको पछिल्लो पत्रलाई सकारात्मक रूपमा लिनुपर्ने बताए। उनले भने,‘मोर्चासँग विगतको वार्ता जहाँ अड्किएको हो, त्यहीँबाट सुरु गर्ने गरी सरकारले बोलाएकाले सकारात्मक रूपमा लिनुपर्छ।’
मोर्चाको बैठक बसेर सरकारलाई औपचारिक धारणा पठाउने सद्भावना पार्टीका महामन्त्री मनीष सुमनले बताए। सरकार गम्भीर देखिएकाले टुटेको संवादलाई निरन्तरता दिन आवश्यक रहेको उनको भनाइ छ। मोर्चाका सात दलसहित संघीय गठबन्धनमा २९ दल छन्। तर ती दल नाम मात्रका दल हुन् । संविधान सभामा नरहेका दललाई जोडेर गठबन्धनले दलको संख्या बढी देखाउँदै आएको छ ।
मोर्चाका ६ दलबाहेकका दलका नेताले मोर्चालाई मात्र सरकारले पत्राचार गरेकाले वार्तामा नजाने बताएका छन्। संघीय समाजवादी फोरमका वरिष्ठ नेता अशोक राईले संघीय गठबन्धनलाई वार्तामा नबोलाएकाले सरकारको नियत सफा नदेखिएको बताए। मधेसको आन्दोलनलाई उपेन्द्र यादवले पहाड र हिमालसम्म उपयोग गरेर ठूलो पार्टी बनाउने दाऊमा छन् भने अन्य मधेसी दलहरु भारतीय योजनाअनुसार मधेसकै सिमांकनको कुरा मात्र प्रमुख रुपले उठाइरहेका छन् ।
