२३ असोज, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्नो पार्टी एमालेमा विलय हुन लागेको नभई एमाले नै माओवादीको एजेण्डामा डोरिएको बताएका छन् । पार्टी कार्यालय पेरिसडाँडामा सोमबार कार्यकर्ताहरुलाई निर्देशन दिँदै प्रचण्डले माओवादी एमालेमा विलय भयो भन्ने बजार हल्लाको पछाडि नलाग्न निर्देशन दिए । माओवादी एमालेमा विलय हुन लागेको नभई एमाले नै गणतन्त्र, संघीयता, धर्म निरपेक्षताजस्ता माओवादीका मुद्दाका पछि लागेको बताए ।
पार्टी एकता भनेको कुनै एक पार्टीको विलयन नभई पुराना दलको विघटन र नयाँ दलको गठन भएको भन्दै उनले भने, “पार्टी एकता माओवादीको एमालेकरण र एमालेको माओवादीकरण होइन । यो नयाँ आधारमा पार्टी बनाउने विषय हो ।”
कार्यक्रममा माओवादीका नेता वर्षमान पुनले पार्टी एकता हुने विषयलाई सकारात्मकरुपमा अगाडि बढाएर देश र जनताको मन जित्न पार्टीका नेता तथा कार्यकर्तालाई आग्रह गरे ।
“पार्टी एकता भन्नु नै एमाले, माओवादी केन्द्र र नयाँ शक्तिको विघटन हो । पुरानै अवस्थामा कोही पनि रहँदैनन् । नयाँ आधारमा नयाँ पार्टी बनाउने कुरा हो ।”
अध्यक्ष दाहालले विगतको आफ्नो पार्टी हिजो मोटो मशाल विघटन नभएको भए एकता–केन्द्र बन्ने थिएन, एकता–केन्द्र विघटन नभएको भए माओवादी बन्ने थिएन भन्दै समयको मागअनुसार पार्टी बन्ने र एकीकृत हुने भएकाले यसलाई अन्यथा रुपमा नलिन आग्रह गरे ।
उनले भने, “हामी विघटन हुँदैहुँदै माओवादी केन्द्रसम्म आयौँ, त्यसले नेपालमा गणतन्त्र र संघीयता सम्भव भयो । अब बन्ने पार्टीले देशमा समाजवादी क्रान्ति सम्भव छ । हामी सो दिशामा केन्द्रित छौँ ।”
उनले समाजवादी क्रान्तिको अभिभारा पूरा गर्न विशाल शक्ति सञ्चयका लागि वाम तालमेल र एकताको प्रयास थालिएको बताउँदै यो एकताले देश परिवर्तका लागि ठूलो तागत सिर्जना हुने दावी गरे । राजनीतिक पार्टी पोखरी जस्तोे जमेर बस्यो भने क्रान्तिको प्रवृत्ति सकिने भन्दै उनले जोखिम मोल्न र चलायमान बन्न कार्यकर्तालाई निर्देशन दिए ।
नयाँ राजनीतिक संस्कार स्थापना गरी मुलुकको आर्थिक र सामाजिक विकासका लागि कम्युनिस्ट पार्टीबीच एकता हुन लागेको बताए ।
पार्टी केन्द्रीय कार्यालय पेरिसडाँडामा पार्टीको सहायक संगठन योङ कम्युनिस्ट लिग वाइसिएल नेपालको केन्द्रीय स्कुलिङ कार्यक्रमलाई सम्बोधन गर्दै उनले एमाले, माओवादी केन्द्र र नयाँ शक्तिबीच हुने पार्टी एकताले नयाँ विचारसहितको पार्टी बनाउने बताए ।
वाइसिएलका इञ्चार्जसमेत रहेका नेता मणि थापाले आगामी निर्वाचन सफल बनाउन युवा शक्तिको भूमिका महत्वपूर्ण हुने धारणा राखेका थिए ।